Terra e amuri

        TERRA E AMURI  

Su cinquant’anni ormai chi ti lassai,

povera terra mia, Sicilia bedda,

nenti mi trattiniu, mancu l’amuri

di patri e matri soru e amici cari.

L’anima libera mia unn’accitava,

usanzi vecchi, modi di pinsari,

diri sempi di si vuscienza vostra,

comu si ntesta mia nenti ci fussi.
.
Puru l’amuri ccà appi a truvari

e menu mali chi na picciuttedda

di mia si nnamurau cuntracambiata,

finu alla fini, fino alla su morte.

Du picciriddi nichi mi lassau,

ora su ranni, hanno figghi soi,

a mmia marresta sulu di pinsari

a terra mia e all’amuri persu.